अरनिको सैनिक कप फुटबल प्रतियोगिता माघ २१ गतेदेखि सुरु हुने

कंचनपुरको पुनर्वासमा माघ २१ गतेदेखि सुरु हुने छैटौं अरनिको सैनिक कप खुल्ला फुटबल प्रतियोगिता हुने भएको छ । क्लबले पत्रकार सम्मेलन गर्दै माघ १६ गतेदेखि सुरु हुने भनिएको प्रतियोगिता खराब मौसमका कारण सर्न गएको जानकारी दिएको छ ।

क्लबका अध्यक्ष जित बहादुर तामाङको अध्यक्षता भएको थियो भने प्रमुख अतिथी पुनर्वास नगरपालिका-६ का अध्यक्ष मित्र सिंह लामा रहेका थिए ।

कंचनपुर जिल्लाकै सर्वाधिक धनराशिको खुल्ला फुटबल प्रतियोगितामा बिभागीय टीम नेपाल आर्मी र नेपाल पुलिस क्लब सहित १९ वटा टिमहरूको सहभागिता रहेको छ । प्रतियोगिताको विजेता टिमले मेडल,ट्रफी,प्रमाणपत्र सहित नगद रु २ लाख ६० हजार र उपविजेता टिमले १ लाख ३० हजार प्राप्त गर्ने आयोजक क्लबका अध्यक्ष जित बहादुर तामाङले जानकारी दिए । प्रतियोगितामा सहभागि हुन टिमले नगद रु १० हजार दर्ता शुल्क तिर्नुपर्ने छ, उनले थपे ।

पुनर्वास नगरपालिका-२ अरनिको बस्ती स्थित क्लबकै खेलमैदानमा हुने प्रतियोगिताको मूख्य प्रायोजकको रुपमा प्रकाश दाहाल स्मृति प्रतिष्ठान रहेको छ भने सह प्रायोजकको रुपमा काठमाडौंको विज्ञान एसआर म्यानेजमेन्ट प्रालि रहेको छ । यस्तै प्रतियोगिता सम्पन्न गर्न पुनर्वास नगरपालिका-६ को कार्यालय र रेडबुलले पनि अर्थिक सहयोग गरेको छ ।

खुल्ला फुटबल प्रतियोगितामा हरेक दिन २ वटा खेल खेलाइने छ । खेल नकआउटको आधारमा खेलाइने छ भने हरेक खेलको म्यान अफ द म्याच हुने खेलाडीलाई रेडबुलको तर्फ रु १ हजार ५ सय प्रदान गरिने बताइएको छ ।

प्रतियोगिता सम्पन्न गर्न कुल १२ लाख ५० हजार रुपैयाँ खर्च हुने अनुमान गरिएको आयोजकले जनाएको छ ।

प्रतियोगिताको उद्घाटन स्वर्गीय प्रकाश दाहाल स्मृति प्रतिष्ठानकी अध्यक्ष पुर्व माननीय विना मगरले गर्ने तय भएको आयोजकले जानकारी दिएको छ । उक्त पत्रकार सम्मेलन कार्यक्रमलाई क्लबका सचिब दिपेश तामाङले संचालन गरेका थिए ।