प्रधानमन्त्री कप क्रीकेट: सुदूरपश्चिमको विजयी सुरुवात

प्रधानमन्त्री कप एकदिवसीय राष्ट्रिय क्रिकेट प्रतियोगितामा सुदूरपश्चिम प्रदेशले विजयी सुरुवात गरेको छ।

आज भैरहवाको सिद्धार्थनगर क्रिकेट मैदानमा भएको खेलमा सुदूरपश्चिमले घरेलु टिम लुम्बिनी प्रदेशलाई ५ विकेटले पराजित गर्‍यो।

लुम्बिनीले दिएको १५९ रन लक्ष्य सुदूरपश्चिमले २९.३ ओभरमा ५ विकेटको क्षतिमा पूरा गर्‍यो। सुदूरपश्चिमका लागि शेर मल्लले नटआउट ४२ रन र नारायण जोशीले नटआउट २८ रन जोडे।

त्यसअघि टस हारेर पहिले ब्याटिङ गरेको लुम्बिनी प्रदेशले ४८.४ ओभरमा सबै विकेट गुमाउँदै १५८ रन मात्रै जोड्न सक्यो । लुम्बनीका लागि प्रज्वल थापाले सबैभन्दा बढी ४२ रन जोडे । बलिङमा सुदूरपश्चिमका नारायण जोशीले ३ विकेट लिए भने भोजराज भट्ट र नरेश साउदले २-२ विकेट लिए।